الى متى نعيش صم بكم عمى
من قلبى اقول
محفور فى قلبى الخوف
مكتوب عليا أشوف
مظلوم ورا قضبان
وحرامى برا جبان
اسمه كمان معروف
مكتوب عليا أشوف
ميكانيكى لما اترقى
وزير وليه مية شقه
مسئول عن المصروف
مكتوب عليا أشوف
رئيس من الفاسدين
كابس بقاله سنين
عالكرسى كان ملهوف
مكتوب عليا أشوف
مجلس لأبو قردان
رجاله مالها ودان
مليانه جبن وخوف
مكتوب عليا أشوف
وزير الخيبه يوه
بيبيع فى أرض أبوه
والله ليه مكسوف
مكتوب عليا أشوف
باشا مسبسب شعره
خطف الحديد وبنعره
قمر البلاد فى خسوف
مكتوب عليا أشوف
مجموعه من الأعرب
بيحركوا فى أعراب
صفاره تلقى صفوف
مكتوب عليا أشوف
يخدوا زميلى تحرى
قال إيه معاهم ذرى
والكف جر كفوف
مكتوب عليا أشوف
سياسه مش فى الدين
بالكدب عالملايين
ارفض تبات مخطوف
مكتوب عليا أشوف
رغيف العيش غريب
طالع بشكل مريب
تايه عليه ألوف
مكتوب عليا أشوف
إذاعى فى الأعلام
بيلعب فى الكلام
ويبدل فى الحروف
مكتوب عليا أشوف
صحفى وقلمه ضعيف
مزقوق على التزييف
والكدب بقى مألوف
مكتوب عليا أشوف
الرقص يبقى الفن
وعالمنا قالوا انجن
لازم يعيش مأروف
مكتوب عليا أشوف
على بيتى يخدوا ضرايب
ويقولوا نبقى حبابيب
البيه خلاص مهفوف
مكتوب عليا أشوف
فاسد بيبقى كبير
والخيش بيبقى حرير
والرشوه عالمكشوف
مكتوب عليا أشوف
أب يدلع فى إبنه
عايز يبطل زنه
والكرسى يبقى الروف
مكتوب عليا أشوف
عباره فى البحر غرقت
ويا عينى قالوا إتحرقت
الميه خلصت .... شوف
مكتوب عليا أشوف
حرامى للأموال
ندل من الأندال
طالع لبره يطوف
مكتوب عليا أشوف
أرضى بقت مش أرضى
الكل ينهش عرضى
والسم جاى ملفوف
.jpg)
المشاركات
0 التعليقات:
إرسال تعليق